أهداف التنمية المستدامة
شو هي أهداف التنمية المستدامة ؟!

بحسب برنامج الأمم المتحدة الإنمائي فهي مجموعة من 17 هدف أقرتها الدول الأعضاء بالأمم المتحدة عام 2015 كنداء عالمي للعمل على إنهاء الفقر وحماية الكوكب والتأكد من أن جميع الناس ينعمون بالسلام والازدهار وذلك بحلول عام 2030 .

طيب بس هي شغلة كبيرة بحجم الأمم المتحدة والدول , كيف نحن فينا نساهم بتحقيقها ؟!!

نحن كأفراد منقدر نقوم بمجموعة من الأنشطة والعادات الي بتخلينا جزء من هي الجهود الدولية ، متل :
- استخدامنا لكيس قماش نجيب فيه مشترياتنا من السوق بدل كيس النايلون المضر بالبيئة ، وهاد بيساهم بتحقيق الهدف 13 ( العمل المناخي ) .
- تطوعنا ضمن جهات هدفها هو إيصال التعليم للمناطق النائية والمتضررة من الحرب بيساهم في تحقيق الهدف الرابع ( التعليم الجيد ) .
- وممكن نشتغل على أكتر من هدف مع بعض متل مشاركتنا بحملة التوعية حول مخاطر الزواج المبكر وهيك منكون ساهمنا بتحقيق الهدف التالت ( الصحة الجيدة والرفاه) والرابع ( التعليم الجيد ) و الخامس ( المساواة بين الجنسين ) .

لهيك العمل على أهداف التنمية المستدامة هو مسؤولية مشتركة بين الأفراد والجمعيات المحلية والمنظمات الدولية والحكومات , ودورنا ممكن يكون توعوي بنشر هي الأهداف والتعريف فيها وبالجهات اللي عم تشتغل عليها أو ممكن يكون من خلال العمل المجتمعي على الأرض .
منذ 1 أسبوع